REKTOR FRANSALI QONAQLARI QƏBUL ETDİ

Bu günlərdə əməkdaşlıq  müqaviləsinin müddəalarına uyğun olaraq “Yuxarı Alzas” Universitetinin bir qrup əməkdaşı- Filologiya fakültəsinin  dekanı xanım  Qreta Komur, Nikol Dzyub, İnkar Kuramayeva, Tatyana Musinova Gəncə Dövlət Universitetində olmuşlar. Qonaqları Universitetinin rektoru professor Yusif Yusibov, Elm və innovasiyalar üzrə prorektor dosent Pərvin Kərimzadə qarşılamışdır.

Rektor ilk öncə Azərbaycan-Fransa dostluğunun tarixindən və bu günki əməkdaşlıqdan bəhs edərək bildirmişdir ki, Azərbaycan  Respubilkasının  təhsil sahəsində  islahat  proqramı, bu sahədə aparılan  tədqiqatların nəticəsi göstərir ki, hal-hazırda  inkişaf  etmiş  Avropa ölkələrinə inteqrasiya olunmaq, Avropada yaşayan  xalqlarla ünsiyyət  yaratmaq  üçün   milli  təhsil sistemində, o  cümlədən, xarici  dillərin müasir  tələblər baxımından  yüksək  səviyyədə  tədrisində  əsaslı dəyişikliklər etmək aktuallaşmışdır.

Mərhum Ulu öndər  Heydər Əliyevin  müdrik xarici  siyasətinin parlaq  nümunəsi  kimi  Azərbaycan və Fransa dövlətləri  arasında hər bir sahədə  məhsuldar diplomatik   münasibətlər  mövcuddur. Ölkələrimiz  arasında əməkdaşlığın  daha da vüsət  aldığı bir dövrdə Gəncə Dövlət Universiteti də beynəlxalq əlaqələrin genişlənməsində önəmli yer tutur. Bu sahədə yeni bir dövr başlanmışdır. 20 iyun 2014-cü ildə  Fransanın Miluz şəhəri ilə Yevlax şəhəri  arasında  “Dostluq  xartiyasının”  imzalanması, Fransa Respublikasının və Azərbaycan Respublikasının Prezidentlərinin təşəbbüsü irəli sürülmüş UFAZ layihəsi, elecə də Miluz “OT Alzas”  Universitetində  Azərbaycanın  xanım  şairəsinin  adını daşıyan Mərkəzin açılması  Fransa-Azərbaycan dostluğunun möhkəmlənməsinə misal ola bilər.  Məhsəti Gəncəvi Mərkəzinin  açılışında Azərbaycan nümayəndə  heyətinin tərkibində    rektorun baş müşaviri  Asif Cavadov və Fransız dili kafedrasının  müdiri  Məhərrəm Orucov da  iştirak etmişlər. Məhərrəm Orucov Fransanın Akademik Palma Ordeni ilə təltif olunmuşdur.

Fransalı qonaqlar da hər iki dövlətin səmimi əməkdaşlığından məmnun qaldıqlarını bildirdilər. Bu həm də iki xalqın əməkdaşlığı, dostluğu deməkdir. Bu əməkdaşlıq istər istəməz xalqların xeyrinədir, elm, təhsil sahəsinidə tərəqqisi deməkdir.

Görüşün sonunda professor Yusif Yusibov kollektiv adından qonaqlara Gəncəni, Gəncə Dövlət Universitetini xatırladacaq hədiyyələr təqdim etdi.