REKTOR TƏLƏBƏLƏRLƏ GÖRÜŞ KEÇİRDİ

21 aprel 2016-cı il tarixdə Gəncə Dövlət Universitetinin II tədris binasında rektor professor Yusif Yusibovun  müxtəlif ixtisasların IV kursunda təhsil alan tələbələrlə imtahanqabağı görüşü olmuşdur. Tələbələri salamlayan rektor onların  sözlərini demələri üçün  dekan və müəllimlərin iştirak etmədiyi bu görüşdə fəal olmalarını, universitetin şərəfinə xələl gətirən qüsurları açıq-aşkar  bildirmələrini tövsiyyə etdi. Qeyd etdi ki, Universitetin bu günki uğurları üçün gərgin iş aparılıb. İstəmişik ki, tələbələrimiz, tələb olunan şəraitli və təminatlı ali məktəbdə təhsil ala bilsinlər. Hər bir tələbənin problemi diqqət mərkəzində olub, onların hərtərəfli inkişafları üçün lazımi qayğılar göstərilib. İmtahanların da şəffaf keçirilməsi ən ümdə vəzifəmizdir. Amma qüsurların, şəffaflığa mane olan səbəblərin aşkarlanmasında daim tələbələrə arxalanmışıq.

Professor Yusif Yusibov olduqca səmimi keçən bu görüşdə tələbələrin imtahan və digər məsələlərlə bağlı suallarını cavablandırdı. Deyilən nöqsanların bir qismi yerindəcə həll edildi, bir qismi də araşdırılması üçün nəzarətə götürüldü. Görüş hər iki tərəfin yüksək razılığı ilə yekunlaşdı.