Universitetdə “Sosial işin təşkili: dünya təcrübəsi, metodlar, standartlar” mövzusunda tədbir keçirilib
Gəncə Dövlət Universitetində “Təmas” Regional İnkişaf İctimai Birliyinin təşkilatçılığı ilə “Sosial işin təşkili: dünya təcrübəsi, metodlar, standartlar” mövzusunda tədbir keçirilib.
“İnsan alveri və potensial insan alveri qurbanlarına xidmət göstərən Regional Reabilitasiya-Reinteqrasiya Mərkəzinin dəstəklənməsi” layihəsi çərçivəsində təşkil olunan tədbir Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə reallaşıb.
Tədbirdə universitetin sosial iş ixtisasında təhsil alan tələbələri və bu ixtisası tədris edən müəllimlər iştirak ediblər.
Tədbiri açan universitetin prorektoru Gülsüm Fətəliyeva qonaqları salamlayıb və layihənin icrasının əhəmiyyətindən danışıb.
Layihə rəhbəri Kubra Ələkbərova icra olunan layihə, donor təşkilat və layihə çərçivəsində həyata keçiriləcək fəaliyyətlər haqqında geniş məlumat verib.
Təlimçi-ekspert Gülnar Nəzərova öz çıxışında bildirib ki, ölkəmizdə Sosial iş ixtisası hələ gənc olmasına baxmayaraq son illər ərzində bu sahənin inkişafına dair geniş fəaliyyətlər həyata keçirilir.
“Sosial iş insanların onları əhatə edən mühitdə mümkün qədər daha yaxşı fəaliyyət göstərmələri üçün onlara yardım etməyə istiqamətlənmiş peşədir. Bütün dünyada Humanitar və demokratik ideyalara əsaslanaraq yaranan sosial iş təcrübəsi insan ehtiyaclarını və potensialını inkişaf etdirmək üzərində fokuslaşıb. İllər keçdikcə sosial iş özündə bir sıra dəyərləri (səmimilik, vicdanlıq, empatiya, rəhimdillik, peşəkarlıq, insan münasibətlərinin əhəmiyyətliyi” birləşdirib” – deyə G. Nəzərova qeyd edib.
Tədbirdə Azərbaycana Birgə Yardım (UAFA) təşkilatının əməkdaşları və Böyük Britanıyalı uşaq müdafiəsi mütəxəssisi, sosial işçi Cohanne Şutt, “SOS Uşaq Kəndləri – Azərbaycan” Assosiasiyası ictimai birliyiinin Gəncə filialının əməkdaşları iştirak ediblər.
