Fəxri Doktorlar

---

---

---

---

---

---

ABBASOV VAQİF MƏHƏRRƏM OĞLU

• Akademik V.M.Abbasovun elmi fəaliyyətinin əsas istiqaməti Azərbaycanın unikal neftlərinin tədqiqi, onların yeni emal proseslərinin yaradılması, nitrobirləşmələrin, metal komplekslərinin, yüksək molekullu aminlərin, amin kompleks-lərinin və çoxfunksiyalı antistatik aşqarların, inhibitorların, inhibitor-bakterisidlərin, konservasiya mayelərinin və sürtkülərinin yaradılması və onların təsir mexanizminin tədqiqi kimi problemlərin həllinə həsr olunmuşdur.
• İlk dəfə olaraq, V.M.Abbasov üzvi nitrobirləşmələrin metal kompleksləri əsasında antistatik aşqarların sintezinin elmi əsaslarını işləyib hazırlamış və bu sahədə yeni elmi istiqamət yaratmışdır.
• V.M.Abbasov tərəfindən işlənib hazırlanmış yüksək istismar xüsusiyyətlərinə görə öz analoqlarından fərqlənən yüksək effektli AP-L34-1 antistatik aşqarı Bakı Şin Zavodunda, Tbilisi Aviasiya Zavodunda və Perm Mühərriklər Zavodunda müvəffəqiyyətlə öz tətbiqini tapmışdır.
• V.M.Abbasov tərəfindən korroziya inhibitorlarının yaradılması və onların tətbiqi sahələrində geniş tədqiqat işləri aparılmışdır. Karbamid və aminlər əsasında yeni növ fosfat komplekslərinin sintez üsulu yaradılmışdır. Onun rəhbərlıyi ilə «VFİKS-82», «Azəri», «Kaspi-2» və s. kimi çoxfunksiyalı korroziya inhibitorlarının istehsalı təşkil olunmuş, Təcrübə-Sənaye Zavodunda «VFİKS-82» inhibitorunun istehsalı üzrə sənaye qurğusu yaradılmışdır. Vaqif Abbasov «VFİKS-82» inhibitorunun istehsal texnologiyasına Rusiya Federasiyasının lisenziyasını almış və Başqırdıstanda Meleuz şəhərində illik gücü 20000 ton gücündə qurğu yaratmışdır. 1988-92-ci illərdə «VFİKS-82» və «Azəri» inhibitorları Ukraynada, Türkmənistanda və «Neft Daşları»nda (Azərbaycan) tətbiq olunmuşdur.
• V.M.Abbasov 1988-1992-ci illərdə korroziya üzrə ASSOKOR Beynəlxalq Assosiasiyasının Rəyasət Heyətinin üzvü olmuşdur.
• V.M.Abbasovun rəhbərliyi ilə «Kaspi-2», «Araz-1» və «Abşeron» adlı inhibitorlar yaradılmış, «Kaspi-2» inhibitoru Heydər Əliyev adına Bakı Neft Emalı Zavodunda katalitik riforminq qurğusunda inhibitor kimi tətbiqini tapmışdır. «Kaspi-2» inhibitoru Heydər Əliyev adına Bakı Neft Emalı Zavodunda (keçmiş “Azərneftyanacaq” İB) katalitik riforminq qurğusunda ABŞ-dan xarici valyuta ilə alınan «Yunikor» inhibitorunun əvəzinə ondan daha effektli olan inhibitor kimi tətbiq olunur.
• V.M.Abbasov neftin ilkin emal qurğuları üçün «Kaspi-Х» neytrallaşdırıcı-inhibitor yaratmış və bu inhibitor Bakı Neft Emalı Zavodunda neftin ilkin emal qurğusunda tətbiq olunmuşdur.
• V.M.Abbasovun rəhbərliyi ilə 1997-ci ildə çoxfunksiyalı parafinçökmə inhibitoru «Parkorin-l» yaradılmış və 1998-ci ildə istifadəsinə başlanılmışdır.
• V.M.Abbasovun rəhbərliyi ilə yaradılmış «Xəzər» deemulqatoru və «Bakı» ərp həlledicisi 1998-ci ildən Bakı Neft Emalı Zavodunda tətbiq olunur.
• Analoqlarından yüksək effektivliyi ilə fərqlənən «NKPİ-34-2» köpükəmələgətiricisi yaradılmış və sənayedə tətbiq olunmuşdur.
• 2009-cu ildə V.M.Abbasovun rəhbərliyi ilə “Kaspi-X(M)” inhibitoru yaradılmış, Heydər Əliyev adına Neft Emalı Zavodunun kimyəvi təmizlənmiş su nəqli sistemini korroziyadan müdafiə üçün tətbiq edilmişdir.
• 2011-ci ildə çoxfunksiyalı “Xəzər-24” deemulqator-inhibitoru yaradılmış, təcrübə-sənaye istehsalı təşkil edilmişdir.
• V.M.Abbasov nitron turşuları əsasında çoxfunksiyalı inhibitor-bakterisidlərin yaradılması ideyasını irəli sürmüş və turşular əsasında çoxfunksiyalı reagentlərin yaradılmasının mümkünlüyünü təsdiq edilmişdir.
• V.M.Abbasovun neft kimyası sahəsində apardığı tədqiqat işlərindən biri, dünyada analoqu olmayan müalicəvi Naftalan neftinin tədqiqinə həsr olunmuşdur.
• İlk dəfə olaraq V.M.Abbasovun yaratdığı texnologiya əsasında Ağ Naftalan mazının istehsalı üçün texniki standartları Respublika Səhiyyə Nazirliyi tərəfindən təsdiq edilmiş və “Ağ Naftalan yağı” Azərbaycan Respublikasının Səhiyyə Nazirliyi tərəfindən dərman preparatı kimi qeydiyyata alınmışdır.
• 2017-ci ildə Tibbi Hidrologiya və Klimatologiya Beynəlxalq Cəmiyyətinin “42-ci Ümumdünya konqresi”ndə təşkil olunmuş beynəlxalq sərgidə “Ağ-Naftalan yağı” yüksək keyfiyyət sertifikatı almışdır.
• “Ağ-Naftalan yağı” 2017-ci ildə Səudiyyə Ərəbistanında kosmetik vasitə kimi qeydə alınıb. Hazırda “Ağ-Naftalan yağı” və Azərbaycanın dərman bitkilərinin yağları əsasında yeni 7 dərman vasitəsi işlənib hazırlanıb.
• Akademik V.M.Abbasovun rəhbərliyi ilə yaradılmış bitum üçün V-2 adgeziya aşqarı 2015-ci ildən Azərbaycan Respublikasının yol tikintisində uğurla istifadə olunur.
• Akademik V.M.Abbasovun rəhbərliyi ilə yaradılmış “Azofos” adlı iki qida elementli və “Azofos-K” adlı üç qida elementli gübrələri 2017-ci ildən başlayaraq tətbiq olunur. Bu gübrələr tullantısız texnologiya ilə alınır və bitkilərin yüksək məhsuldarlığını təmin edir.
• Onun ideyası ilə bitkilərin boy stimullaşdırıcıları olan “Qarabağ-1”, “Qarabağ-2”, “Qarabağ-3 və “Qarabağ-4” reagentləri işlənib hazırlamışdır.
• Vaqif Abbasovun rəhbərliyi ilə yaradılmış Parkorin-22 A inhibitor-depressant və Parkorin-22 parafinçökmə inhibitorunun 2022-ci ildə sənaye istehsalı təşkil olunmuşdur.
• V.M.Abbasov ixtisaslı kadrların hazırlanması sahəsində böyük iş aparır. Onun rəhbərliyi ilə 41 fəlsəfə doktoru və 14 elmlər doktoru müdafiə etmişdir.
• Vaqif Abbasov həm də böyük elmi-təşkilati və ictimai işlər aparır, elmlər doktorluğu və fəlsəfə doktorluğu dissertasiyalarının müdafiəsi üzrə ED 1.16 dissertasiya şurasının sədridir.
• Vaqif Abbasov Azərbaycan təhsilinin də inkişafına böyük töhfələr verib. 1992-ci ildən 2013-cü ilə qədər Təhsil Nazirliyinin məktəblilərin Kimya Olimpiadasının Respublika tu¬ru¬nu keçirən münsiflər heyətinin sədri, 2001-2013-cü illərdə Tələbə Qəbulu üzrə Dövlət Komissiyası nəzdində kimya üzrə ekspert komissiyasının və seminarın sədri olmuşdur. V.M.Abbasov 2001-ci ildən Elm və Təhsil Nazirliyinin Elmi Metodiki Şurasının “Kimya və kimya texnologiyası” bölməsinin sədridir. 2003-cü ildə Təhsil Problemləri İnstitutu ilə birlikdə “Kimya məktəbdə” elmi-metodiki jurnalı təsis etmişdir və onun baş redaktorudur.
• 2000-cü ildən AMEA-nın akademik Y.H.Məmmədəliyev adına Neft-Kimya Prosesləri İnstitutunda “Neft Kimyası və Neft Emalı Prosesləri” jurnalı təsis olunub, Vaqif müəllim həmin ildən “Neft Kimyası və Neft Emalı Prosesləri” elmi jurnalının baş redaktorunun müavini, 2016-cı ildən bu jurnalın baş redaktorudur. Bu jurnal beynəlxalq nüfuzlu jurnalların siyahısına salınmış az saylı elmi jurnallardan biridir.
• V.M.Abbasov elm və təhsilin inkişafı sahəsində səmərəli fəaliyyətinə görə 2005-ci ildə “Azərbaycanın Əməkdar Müəllimi” fəxri adına layiq görülmüş və “Şöhrət” ordeni ilə təltif olumuşdur.
• V.M.Abbasov 2000-2005-ci illərdə Azərbaycan məktəblilərinin Ümumdünya olimpiadalarında, müxtəlif illərdə Beynəlxalq Mendeleyev Kimya olimpia¬dalarında iştirak edən komandaların rəhbəri olmuşdur.
• V.M.Abbasov bir sıra xarici təşkilatlar tərəfindən mükafatlara, ordenlərə və adlara layiq görülmüşdür. O, 2009-cu ildə İslam Ölkələri İqtisadi Əməkdaşlıq Təşkilatının (EKO) elm və texnologiya üzrə baş mükafatına layiq görülmüşdür. O, 2009-cu ildə Avropa Biznes Assambleyasının mükafatını almış, 2013-cü ildə “Elmdə ad” Sokrat mükafatına və ordeninə layiq görülmüş, elə həmin ildə Türk Dünyası Araşdırmaları Uluslararası İlimlər Akademiyasının akademiki seçilmiş və “Uluslararası Altın Yıldız Madalyası” ilə təltif olunmuşdur, eləcə də Təbiətşünaslıq elmləri üzrə Avropa Akademiyasının həqiqi üzvü seçilmiş, Kuratorluq və Elmi Şuranın qərarı ilə elmi tədqiqatlarda xüsusi xidmətlərinə görə “Əsas Qızıl Cəngavər ulduzu”na layiq görülmüş, Rusiya Federasiyası Təbiət Elmləri Akademiyası “Neft və Qaz” seksiyası üzrə xarici üzv seçilmişdir.
• 2014-cü ildə elm sahəsindəki fəaliyyətinə görə Avropa Əməkdar Elm Xadimi adına, eyni zamanda Avropa Təbiət Elmləri Akademiyası tərəfindən “Xidmətə görə” Böyük Gümüş Xaç ordeninə layiq görülmüşdür. Rusiya Federasiyası Təbiət Elmləri Akademiyası “Neft və Qaz” seksiyası üzrə xarici həqiqi üzvü seçilmişdir.
• 2015-ci ildə böyük nailiyyətlərinə görə Rusiya Elm və İncəsənət Akademiyası laureatının Qızıl medalı ilə təltif olunmuş və “Kim kimdir?” Ümumdünya nəşrinin biblioqrafik sorğu kitabının laureatı seçilmişdir.
• 2019-cu ildə akademik Vaqif Abbasov “Azərbaycanda neft-kimya elminin inkişafındakı uzunmüddətli səmərəli fəaliyyətinə görə “Azərbaycan Respub¬likası Prezidentinin fəxri diplomu”na layiq görülmüşdür.
• 2020-ci ildə, akademik Vaqif Abbasov “Azərbaycan Dövlət Neft və Sənaye Universitetinin 100 illiyi Azərbaycan Respublikasının yubiley medalı” ilə təltif olunmuşdur.
• 2022-ci ildə akademik Vaqif Abbasov Kazan Milli Təd¬qiqat Texnoloji Universi¬tetinin fəxri doktoru və Ufa Dövlət Neft Texniki Universitetinin fəxri profes¬soru seçilmişdir.
• AMEA-nın Rəyasət Heyətinin 5 sentyabr 2022-ci il qərarı ilə akademik V.M.Abbasov 70 illik yubileyi ilə əlaqədar olaraq Yusif Məmmədəliyev adına Xatirə nişanı ilə təltif olunub.
• Azərbaycan Respublikası Prezidentinin elan etdiyi “Şuşa İli”ndə Qarabağ-Şuşa mövzusunda apardığı tədqiqatlarına görə akademik Vaqif Abbasov 2022-ci ildə AMEA-nın Fəxri Fərmanı ilə təltif edilmişdir.
• Türk Dünyası Araşdırmaları Beynəlxalq Elmlər Akademiyasının Beynəlxalq Mükafat Komitəsinin 12 dekabr 2022-ci il tarixli qərarı ilə Vaqif Abbasov “Türk Dünyasının Fəxri Elm Adamı” Beynəlxalq Mükafatı və Türk dünyası elminə və təhsilinə böyük xidmətlərinə görə “Avropa Şərəf Ordeni” ilə də təltif edilmişdir.
• Azərbaycan kimya elminə verdiyi dəyərli töhvələrinə, gənc alim və tədqiqatçıların , doktorantların yetişdirilməsindəki xidmətlərinə görə və 70 illik yubileyi münasibəti ilə 23 noyabr 2022-ci il tarixində Bakı Ali Neft Məktəbinin Fəxri Alim Diplomu ilə təltif olunub.
• AMEA Rəyasət Heyətinin 13 mart 2023-cü il tarixli qərarı ilə əsərlərinə ən çox istinad edilməsində fərqləndiyinə görə Vaqif Abbasov Azərbaycan Milli Elmlər Akademiyasının “İstinadda rekord” diplomu ilə təltif olunub
• 19 sentyabr 2023-cü il tarixdən 20 sentyabr 2023-cü il tarixədək davam etmiş lokal xarakterli antiterror əməliyyatlarında Kəlbəcər hərbi hospitalının şəxsi heyətinin arxa təminat işlərinə yaxından kömək etdiyinə görə Vaqif Abbasov Fəxri Fərmanla təltif olunub.
• Azərbaycan Respublikası Elm və Təhsil Nazirliyinin 26 oktyabr 2023-cü il tarixli əmri ilə Vaqif Abbasov “Azərbaycan Dövlət Pedaqoji Universitetinin 100 illiyi (1921-2021) Azərbaycan Respublikasının yubiley medalı” ilə təltif olunub.
• Vaqif Abbasov Prezident İlham Əliyevin 2 fevral 2024-cü il tarixli Sərəncamı ilə “Heydər Əliyevin 100 illiyi (1923-2023)” Azərbaycan Respublikasının yubiley medalına layiq görülüb.
• Professor 1590 əsərin, o cümlədən, 91 patent və müəlliflik şəhadətnaməsinin, 6 ixtiraya dair iddia sənədinin, 647 elmi məqalənin, 645 tezisin, 84 publisistik məqalənin, 9 monoqrafiyanın, 24 dərslik, 23 dərs vəsaitinin, 23 publisistik kitabın, 18 elmi kitabın müəllifi, 20 kitabın redaktorudur.
• “Bioloji varlıqdan şəxsiyyətə ucalmaq yolu”, “Müdrik kəlamlar”, “Liderlik fəlsəfəsi”, “Ünsiyyətdən başlanan ucalmaq yolu”, “Dahilərin, müdriklərin və fatehlərin həyat dərsləri” (I (2010), II (2013), III (2020), IV (2021), V (2023) cildi Ulu Öndər Heydər Əliyevin xatirəsinə ithaf olunub), VI (2023) , “Təbiət kimyasının möcüzələri və ondan istifadə qaydaları”, “Ömür yoluma suallarla səyahət”, “Qarabağ Azərbaycandır”, “Uğurlu insan olmaq yolu”, “Ulu öndər Heydər Əliyevin neft və neft emalı strategiyası” , “Öyrənmək və dərk etmək, uğurlu yaşam demək” , “Türkiyə, Azərbaycan, yeni Turan yaradan” adlı publisistik kitabları oxucular tərəfindən maraqla qarşılanmışdır.
• 2002-ci ilin mayın 27-dən Yeni Azərbaycan Partiyasının üzvüdür. AMEA təşkilatları arasında ilk partiya özəyini akademik Y.H.Məmmədəliyev adına Neft-Kimya Prosesləri İnstitutunda yaradıb və özəyin rəhbəri olub. 2005-2011-ci illərdə İctimai Televiziya və Radio Yayımları Şirkətinin Yayım Şurasının üzvü olub.
• 2024-cü ildə Gəncə Dövlət Universitetinin Fəxri doktoru adına layiq görülmüşdür.