SƏN EY İSTİQLALIMIN ƏBƏDİYYƏT SANCAĞI – AZƏRBAYCAN BAYRAĞI
Dövlət Bayrağı Günü münasibətilə Gəncə Dövlət Universitetində təntənəli tədbir keçirilib.
Tədbirdə universitetin professor-müəllim heyəti və tələbələr iştirak ediblər.
Tədbir iştirakçıları əvvəlcə Azərbaycanın ərazi bütövlüyü və sərhədlərinin toxunulmazlığı uğrunda canından keçən şəhidlərin ruhunu bir dəqiqəlik sükutla yad ediblər. Dövlət Himninin səsləndirilməsi ilə tədbir açıq elan olunub.
Bayram tədbirində çıxış edən Gəncə Dövlət Universitetinin prorektoru Gülsüm Fətəliyeva Azərbaycanın əbədi rəmzi, tarixi qələbələrimizin şahidi olan üçrəngli bayrağımızın ilk dəfə ucaldıldığı tarixdən və hər il noyabrın 9-nun Azərbaycanda Dövlət Bayrağı Günü kimi qeyd olunmasının əhəmiyyətindən danışıb. Bildirib ki, Azərbaycan müstəqilliyini bərpa etdikdən sonra dövlət bayrağı ölkəmizin bütün vətəndaşları üçün müqəddəs dövlətçilik rəmzlərindən birinə çevrilib. Azərbaycan Xalq Cümhuriyyətinin yadigarı olan bu bayraq xalqımızın azadlıq məfkurəsinə, milli-mənəvi dəyərlərə və ümumbəşəri ideallara sadiqliyini nümayiş etdirir.
Azərbaycan Respublikasının dövlət bayrağı 1918-ci il noyabrın 9-da Azərbaycan Xalq Cümhuriyyəti hökumətinin iclasında qəbul edilib və 1920-ci ilin aprel ayınadək dövlət statusuna malik olub. Həmin bayraq 1990-cı il noyabrın 17-də Naxçıvan Muxtar Respublikası Ali Məclisinin sədri Heydər Əliyevin təşəbbüsü və rəhbərliyi ilə keçirilən sessiyada Naxçıvan Muxtar Respublikasının dövlət bayrağı kimi təsdiqlənib. 1991-ci il fevralın 5-də Azərbaycan Respublikasının Ali Soveti “Azərbaycan Respublikasının Dövlət bayrağı haqqında” Qanun qəbul edərək onu dövlət bayrağı elan edib.
1991-ci il oktyabrın 18-də “Azərbaycan Respublikasının dövlət müstəqilliyi haqqında” Konstitusiya Aktı ilə Azərbaycan Respublikası Azərbaycan Xalq Cümhuriyyətinin varisi kimi onun dövlət rəmzlərini, o cümlədən dövlət bayrağını bərpa edib. 2004-cü il iyunun 8-də “Azərbaycan Respublikası Dövlət bayrağının istifadəsi qaydaları haqqında” Qanunla bu sahədə qanunvericilik bazası təkmilləşdirilib.
2009-cu il noyabrın 17-də Prezident İlham Əliyev “Azərbaycan Respublikasının Dövlət Bayrağı Gününün təsis edilməsi haqqında” Sərəncam imzalayıb. Həmin il dekabrın 4-də isə Milli Məclis noyabrın 9-nu Dövlət Bayrağı Günü kimi rəsmiləşdirib.
Tədbirdə işğal altındakı torpaqlarımızın tezliklə azad olunacağına və Azərbaycan bayrağının Qarabağda dalğalanacağına əminlik ifadə edilib.
Konsert proqramı ilə davam edən tədbirdə universitetin tələbələri bayrağa həsr olunan şeirlər söyləyiblər. Gənclərin ifa etdikləri vətənpərvərlik mahnıları böyük coşqu ilə qarşılanıb.
