7 oktyabr – Ümumdünya Layiqli Əmək Gününə həsr edilən tədbir keçirilib
Gəncə Dövlət Universitetində Həmkarlar İttifaqı Komitəsinin (HİK) təşkilatçılığı ilə 7 oktyabr – Ümumdünya Layiqli Əmək Gününə həsr edilən tədbir keçirilib.
“Layiqli əmək, layiqli həyat deməkdir” adlı tədbiri HİK-nin sədri Afaq Qasımova giriş sözü ilə açaraq layiqli əmək gününün ilk dəfə 2008-ci ildə Beynəlxalq Həmkatrlar Konfederasiyası tərəfindən irəli sürülməsini diqqətə çatdırıb, layiqli əməyin mahiyyəti, dövlətimiz və həmkarlar ittifaqları tərəfindən bu aspektdə görülən işlər barədə məlumat verib. Onu da qeyd edib ki, universitetimizdə ittifaq üzvlərinə yaradılan sağlam və təhlükəsiz əmək şəraiti, onların əmək haqqlarının vaxtında verilməsi, məzuniyyət hüquqlarından istifadə və s. məsələlər hər zaman diqqət mərkəzindədir.
Tədbirdə universitetin baş hüquqşünası Günay Şirinova çıxışında bildirib ki, Azərbaycanda əmək münasibətlərinin müasir tələblərə uyğunlaşdırılması sosial siyasətin əsas istiqamətlərindən biridir. Əmək qanunvericiliyinə dövlət nəzarətinin gücləndirilməsi, rəqəmsal texnologiyaların tətbiqinin genişləndirilməsi, qeyri-rəsmi məşğulluğun qarşısının alınması və işçi hüquqlarının daha etibarlı qorunması istiqamətində ardıcıl tədbirlər görülür.
Filologiya və xarici dillər fakültəsi üzrə həmkarlar təşkilatının sədri Aynur Novruzova vurğulayıb ki, 7 oktyabr – Ümumdünya Layiqli Əmək Günü ölkəmizdə həyata keçirilən sosial siyasətin tərkib hissəsidir. Bunun nəticəsidir ki, ölkəmizdə vətəndaşlar üçün səmərəli məşğulluq, sağlam və layiqli iş yeri, əmək şəraiti yaradılıb. Aparılan işlərin əsas məqsədi hər şeydən əvvəl insan amilinə, insanların rahatlığına yönəlmişdir.
Daha sonra universitetin İnsan resursları şöbəsinin müdiri Gülçöhrə Tağıyeva, universitetdə əməyin mühafizəsi üzrə mühəndisi Sərxan Bağırov çıxışlarında mövzu ətrafında geniş məlumat veriblər.
Ekologiya və təbiəti mühafizə kafedrasının müdiri Sevda Əhmədova, Kimya kafedrasının müdiri Aynur Məmmədova, kafedranın baş müəllimi Sevinc Zeynalova, Botanika kafedrasının baş laborantı Aygün Qədimova mövzu ilə bağlı bir neçə suallar səsləndiriblər.
Sonda tədbir iştirakçıları tərəfindən təkliflər irəli sürülüb.
